英超最高薪續約做魔頭 朗尼話晒事

曼聯以前係費格遜話晒事，冇球員大得過佢，佢一句說話，連堅尼同碧咸都冇得留低。但家陣莫耶斯嘅形勢比人弱，邊可能話點就點，而且仲係要「跪地餵豬乸」㖭！英國傳媒話佢𠱁掂朗尼，朗尼除咗會係紅魔新任隊長，周薪亦由25萬鎊加到30萬鎊（約390萬港元），仲一簽就簽5年半，有可能會喺奧脫福踢到掛靴。

30萬鎊周薪簽5年半
其實，朗尼早喺去年10月同曼聯傾續約時，就還價要8,600萬鎊簽5年半，但曼聯見朗尼成28歲，而且覺得隊波唔係靠佢一個，所以唔鬼理佢。但係，自從費格遜喺舊年夏天榮休後，曼聯真係立立亂，成績差到冇朋友之餘，連成班主力都嗌走，其中隊長尼曼查維迪落實喺今夏約滿離隊，射手尹佩斯亦被傳想食回頭草返阿仙奴。莫耶斯見勢色唔對路，仲唔嗱嗱臨做嘢咩。

尹佩斯心淡食回頭草
英國傳媒日前就爆料，曼聯向現實低頭。得番18個月合約嘅朗尼同意繼續留隊，簽咗份總值7,000萬鎊嘅5年半新約，周薪由25萬鎊加到30萬鎊，多過隊友尹佩斯，成為英超史上人工最高嘅球員。我求大俠幫朗尼計過，呢位英格蘭國腳前鋒家陣28歲，喺2019年夏天約滿後就差不多33歲，換言之好有機會喺奧脫福踢到掛靴。
消息人士話：「莫耶斯視朗尼為曼聯重組嘅基石。」查實曼聯新任行政總裁活華特之前都講過，朗尼係無可替代，所以佢哋肯畀30萬鎊周薪朗尼，絕對係合情合理。另外，英格蘭國家隊領隊鶴臣亦好開心見到朗尼長留曼聯，事關「三獅兵團」會喺今夏出戰巴西踢世盃決賽周，朗尼早早解決前途問題，咪可以專心同英格蘭備戰世盃囉。不過「針冇兩頭利」，曼聯咁做肯定得失盛傳同朗尼有心病嘅尹佩斯，但講真，尹佩斯成30歲，而且係藥煲，一傷就傷幾個月，換轉我求大俠係莫耶斯，我都揀朗尼而唔揀尹佩斯啦！


[img]http://static.apple.nextmedia.com/images/apple-photos/apple/20140217/large/aa0401a.gif[/img]


來源:蘋果日報網站